Караль Ёзэф Вайтыла - чалавек-легенда

1 мая 2011 года ў Ватыкане прайшла беатыфікацыя першага ў гісторыі каталіцкай царквы Папы Рымскага-славяніна Яна Паўла II.

Хто ён, Ян Павел II - Караль Ёзэф Вайтыла? Якія ўчынкі вялікага сучасніка, выхадзца з суседняй Польшчы, увайшлі ў сусветную гісторыю?

На фота: Скульптура Яну Паўлу II у Мінску каля Чырвонага касцёла (св. Cымона і Алены). 1 мая 2011

Караль Ёзэф Вайтыла нарадзіўся 18 мая 1920 года ў Вадовіцах Кракаўскага ваяводства. Не дасягнуўшы 20 год застаўся круглым сіратой.

Шлях да падпольных курсаў Кракаўскай духоўнай семінарыі пралягаў праз выдатную вучобу ў ліцэі, паступленне на філасофскі факультэт Ягелонскага універсітэта, удзел у тэатральным кружку "Студыі 38".

Караль яшчэ ў юнацтве стаў паліглотам - размаўляў на родной польскай мове і шэрагу іншых еўрапейскіх моў - рускай, украінскай, славацкай, італьянскай, іспанскай, французскай, нямецкай, англійскай і, безумоўна, лацінскай.

1 лістапада 1946 года Караль Ёзэф Вайтыла стаў святаром, а 16 кастрычніка 1978 - 264-м "Servus Servorum Dei" ("рабом рабоў Божых") - прадстаяцелям Рымска-каталіцкай царквы, узяўшы імя Ян Павел II.

21 мая 1995 года Ян Павел II папрасіў прабачэння за зло, якое было зроблена каталікамі прадстаўнікам іншых рэлігійных канфесій, а 4 мая 2001 года - за спусташэнне Канстанцінопаля крыжаносцамі ў 1204 годзе. Пакаянне было прынесена і за інквізіцыю, і за Варфаламееўскую ноч 24 жніўня 1572 года, і за пераслед яўрэяў, і за раскол царквы, рэлігійныя войны, крыжовыя паходы... Былі рэабілітаваны Галілео Галілей, Мікалай Капернік. Напэўна, не адна рэлігія ў гісторыі чалавецтва, не прыносіла столькі прабачэнняў.

Ян Павел II быў нязломным барацьбітом за свабоды і правы чалавека, праціўнікам аўтарытарызма і камуністычных ідэй, выступаў супраць любых войнаў. Ён меў непрымальную пазіцыю да абортаў і сродкаў кантрацэпцыі, гомасэксуальных шлюбаў і эўтаназіі.

Ян Павел II прызнаваў дасягненні навукова-тэхнічнага прагрэсу, у прыватнасці, прызначыў заступнікам Інтэрнэту святога Ісідара Севільскага.

Памёр Караль Ёзэф Вайтыла - Ян Павел II 2 красавіка 2005 года ў 84-гадовым узросце. Пахаванне пантыфіка прайшло ў лепшых традыцыях сучаснага глабалізаванага свету - каля 2 мільярдаў гледачоў з усіх куткоў планеты сачылі за жалобнай цэрымоніяй у прамым эфіры.